Самарқанның көк тасы иіп, жібіп, көктем жаршысы наурызкөк Ұлыстың ұлы күнінің келгенін жария ететін датаға орайластырып отандық телевизия алтын қордағы жаһұттарды жомарттық таныта ұсынды. «Менің атым Қожа», «Гауһартас», «Тақиялы періште», «Алпамыс мектепке барады» (Алпамыстың роліндегі «бала» қазір орда бұзар жаста-ау, ә?!)… Шәкен Айманов пен Абдолла Қарсақбаевтардың өлмес мұралары болмаса кім біледі, отырар ма ек шегіркөздің «Будулайы» мен «киелівудтың» «теміртатырларына» телміріп.

Хош, қара топырақ бусанып, жер-жаһан қызылды-жасылды көкке оранатын әз Наурызға тарту-таралғы ретінде қаладағы синемада «Ойпырмай немесе менің қымбатты балаларым» отандық киносының тұсаукесері болды. Тұсаукесері емес, премьерасы дейік дәлдік үшін. Бәкең екеуміз барып ек. Бұл туралы «айқындықтар» өз «рецензиясын» беріп те үлгеріпті.

Кинозалға жиылысқан дүйім жұрт кей эпизодтарда ішек-сілесі қатып, қарқылдап күлгені рас. Киноға позитив пен болымды күш-қуат алып, тұла бойға пәрмен бітіріп шыққың келетіні бар емес пе еді?! Міне, соның кебі. Кигендері.

Кино тек таза коммерциялық табыс үшін түсірілсе, контентіне бағыттап «қарғыс/алғыс, лағнет/респект» (копирайтс – Асаубота) айтып береке таппақ жоқ, сірә. Өзінің мөрленген клишелері бар, кей ретте тәлімдік маңызға претензиясы бола бермейтін сюжеттері бар демекші… Режиссер бұған дейін «Қарой» туындысын жарыққа шығарыпты. Өзім көрмегесін, сын-мін айтпан. Бірақ кей отандық кино жанашырлары фильмнің жеткізбек болған месседжіне дүрдараз күймен қарайтынын байқадым түрлі платформадағы пікірлерінен.

«Ойпырмай» менің пайымдауымша комедия жанрында түсіріле отырып, күйкі тірліктің шет-жағасын паш етуге талпынған. Білуімше, елдегі көрсетілімінен кейін іле-шала әлемдік аренаға сапар шегетін ұқсайды. Ендеше, осы фильм аясында шет елдік аудитория тағы бір мәрте қазақтар мен олардың болмыс-бітімі туралы дерекке қанықпақ. Бұл өзі үдеріс болып келеді осындай. «Тюльпан», «Сталинге сыйлық», тағы да өзге «made in KZ» ленталары шалғай елдердегі кинобәйгелерде бақтарын сынап, көсегелері көгеріп жатқандары да бар. Осы тұрғыдан алып қарағанда, әлбетте, фильмнің тұтас идеясы, расында да, кемшін соғатын тұрмыстың кикілжіңдеріне төрін ұсынған. Әрине, киноға апарып тек жарқырап, жайнап тұрған компоненттерді тықпақтай бермейсің. Қазақ киноларына доминантты түрде натуралдылық (табиғилық десек пе екен…) образдар тән сияқты. Ауыл, ауылдағы өрістен қайтқан мал, маңырап-жамырауы, содыр әккілердің мәтәсиклі (ол тағы оталмай, қырсығып тұрып алады)… «Ойпырмайдағы» мұндай екпін ауылдан қалаға балаларына сауын айта келген апа мен кенже ұл дәнекерлігімен көрініс тапқан. Мінездерінде (дау туғызардай) немкеттілік пен әдепсіздік дейміз бе, әйтеуір жағымсыздау бір микстуралар байқалады. Бірақ, көрерменнің ықыласына бөленіп, оны қырап топан күлкіге батыруы фильмнің озат сюжеттерден кенде емес екеніне анық айғақ. Залда отырған алдыңғы толқын апалардың жылы қабақпен қарсы алуынан соны ұққандай болдым. Әсіресе, кенже ұл мен апасының бір үйден екінші үйге бара жатқандағы билері ұнады. Сосын, Майра атты қызы, соның жатақханасына барып, қуырдағын ұрлап кеткен суайттарды иіс арқылы іздеу барысындағы музыка ұтымды түрде кәдеге асқан деп білдім. Айтпақшы, алып қашқан қыздың артынан «кешірімшілердің» (хабаршылар) барғандағы ана бір қыздың жымиыстары да қызық енді…

Тағы бір назарымды аударғаны, бір домбыра үш бөлек жерде пайдаланылған… Тырнақ астынан кір іздей берсең, шыға беретін шығар. Езгілей бергің келсе. Анық ниетің сол екен – төтесінен маникюр салонына тарт, жарқыным. Тырнақтың апай-топайын шығарушылардың темірқазығы сол жер болсын. Бірақ, өз ұлтыңның ақ-қарасы жария етілетін туынды болғасын бей-жай қарап отырмау керегі тағы бар… Ұрып-соғып, «отыр, қалың екі» дейін десең бір түрлі сияқты. Қиямет жұмыс жатыр себебі ар жағында. Дегенмен, 850 мың долларға комедия да болса тәрбиелік жүгі мен миссиясы қомақтылау дүние түсіруге болады ма еді деп кібіртіктеп қаласың… Жалпы, фильм менде екіұдай, кіл инь мен яндардан тұратын апофеоздардың тууына түрткі болды. «Әй, қазақтар, жаппай барып қараңдар» дейін десем, ертең құмары қанбаған аудитория бәтеңкелерін ала жүгіріп қуса қашып құтыла қойман. Бір білерім, бұл фильмді ертеңдері жанталасып, дүкен сөрелерінен DVD нұсқасын іздей қоймайтын сияқтымын. Ал «Рэкетирдің» дивидиін алып едім… Ааа, не дейсіз? Антипатияға толы аннотацияны неғып жазды деп жатыр дейміміз? Пішту! Так и передайте им, @$#$# айырам…

Ілмек: "Ойпырмай", не смотреть всем, рецензия, смотреть всем, өздерің біліңдер

(Баға беріңіз)

 Loading ...