Баяндыкінен оқыдым. Өзіме сұмдық қызық көрінді. Алғашқыда пікір ретінде жазғым келіп еді, ол райымнан қайтып, өзімнің «топ ондығымды» құрағым кеп кетті.

Қазіргімнен алдыңғы жұмысымда құлтемірге құлаққапты жалғап қойып жиі тыңдайтынмын. Қазіргімде өйтуге мұршам жоқ па, білмедім, бірақ негізінен машина жүргізіп бара жатып тыңдау ғана несібе боп тұр. Сонымен, менің ондығым:

1. Қарақат. «Балапан қаз» (жетігенмен айтады)
2. Қарақат. «Жылқышының әні»
3. Мейрамбек. «Қазағым»
4. Мейрамбек. «Алланың бары һақ»
5. Алтынбек Қоразбаев. «Шашбаулым»
6. Алтынбек Қоразбаев, Мейрамбек Беспаев. «Ақ дегелек»
7. Құрмаш Маханов. «Кездесу мен қоштасу»
8. Каспий тобы. «Жарағым-ай»
9. Ерболат. «Мен қазақпын»
10. JSC. «Жизнь была бы сказкой»

Онша-мұнша көзтаныс, сөзтаныс ұжымдастар «ана әннің ана жері қандай еді» деп орысша, ағылшынша «хиттердің» мәтінін сұрайды. Білмеймін. Кеңседе әрлі-берлі ырғалып-жырғалғанда «ың, ың, іңі, іңі» деп ырғағын келтіріп, ыңылдағаным болмаса, сөздерін біле бермейді екенмін. Осы, кейбіреулер болады ғой, үтір, нүктесіне дейін айна-қатесіз тізіп беретін. Таң қалам өз басым…

Көп ретте ұлттық фольклорды ұйитыным жастайда, кенже ұл болғасын үлкендердің онша-мұнша отырыстарына жиі «этачмент» (жалғанған, «қыстырылған» қосымша) болып ілесіп отыруымнан шығар. Әр жерде ауылдың алты ауызын естисің. Әр ауылдың, тіпті әр «көшенің» өз мақамы болады! Керемет! Небір көпке танылмай қалған дарынды импровизаторлар тағдыр тауқыметімен үйіндегі ошақ басынан аса алмаған апалар мен егде тартқан әжейлер ме деймін…

Рейтингілеп, анаусы бірінші, мынаусы пәленшесінші деп жіктеу де аздап ыңғайсыздау шығар. Әйтеуір, өзіме көңліме қонымдысы боп жүргені әзірге осы. Саңғыр-сұңғыр, даңғұр-дұңғырға біздің есту аппаратымыз шыдас бермейтін тәрізді…

Замандар өтеді, ұрпақтар жаңарады. Ат тұяғын тай басады. Ал Шәмшілер мен Нұрғисалардыкі мәңгі жадымызда, жүректің төр түкпірінде салтанат құрып қала бермек!

Ілмек: балапан қаз, енді маған сен бір елессің, жизнь была бы сказкой

(2 дауыс, орташа есеппен: 5.00 / 5)

 Loading ...