Ат төбеліндей 12 жыл… 12 жыл медальге шөліркеу, шеке тырысып, бір жарымай жүру қиын сынақ. Өткен ғасырдың 94-ші жылы Лиллехамердегі Смирновтың айымызды оңымыздан тудыртқан алтыны мен 98-дегі Прокашеваның қоласы айта-айта жүрер толағай табыс еді. Одан кейінгі жылдар бойында Олимпиададағы «қуаңшылық» бүгінге дейін созылып, апшымызды қалайша қуырғанын еске түсіре де бергің келмейді екен. Ванкуверде асық алшыдан түсер деп, ашығын айтайық, қарабайыр жанкүйер біз де, құзырлы шенеуніктер де күтпеді-ау осы. Атыңнан айналайын Хрусталева деген «қызымыз» биатлонда құралайды көзге атты, төрт ату межесінде жиынтық саны 20 нысананы түгел көздеді. Бергерден кейінгі екінші орында тұрақтауы әлем БАҚтарының сенсация деп беретін «ыстық бәліші» болғалы тұр. Рас, тұла бойды қуаныш тұтастай баурап алды қазір. Күміс медальді болдық… Санаға енді-енді еміс-еміс жатысып жатыр. Соңғы сәтке дейін мәреге соңыра келетін бәсекелестер қырсық қылмас па екен деумен тілеулес болдық… Хрусталева табандылықтың кәнігі үлгісін паш етті бірақ. Ризамын. Жұп болсын дегің келеді екен… Қанағатшылдықты да ойлап қоясың бір жағынан, есіргің келмей. Қазақстан жалауы Канада төрінде бізді толқытып желбіреп тұр әне. Олимпиада алдында отандық БАҚтарда қоғами резоннанс тудырған фотосессия жасарманы болса да, өзіне жүктелген вәзипаны адал атқарды деп білеміз. Лена қыздың ныспы ендігіде әлемдік биатлон анналдарында лайықты қошеметпен жазылып қалмақ. Мәнерлеп сырғанауда алматылық Тен деген азаматымыз бірінші кезеңнен кейін оныншы орынды місе тұтуын да зор табысқа балап ек, биатлондағы күміс естен тандырды… Енді ешнәрсеге алаңдамай, тәтті ұйқы құшағына кете берсе болатындай. Ұйықтап қалған жамағат, таңертең омырауыңда күміс медаль жарқырап тұрады. Айтпады деме…

(13 дауыс, орташа есеппен: 4.38 / 5)

 Loading ...